اردوورلڈکینیڈا(ویب نیوز)نئے مالی سال کے آغاز کے ساتھ ہی وفاقی حکومت نے پیٹرولیم مصنوعات پر عائد مختلف لیویز کی شرح میں ردوبدل کر دیا، تاہم اس تبدیلی کے باوجود پیٹرول اور ڈیزل کی قیمتیں برقرار رکھی گئی ہیں۔

حکومتی فیصلے کے مطابق کلائمیٹ سپورٹ لیوی میں 2 روپے 50 پیسے فی لیٹر اضافہ کر دیا گیا ہے، جس کے بعد اس کی شرح 2 روپے 50 پیسے سے بڑھا کر 5 روپے فی لیٹر کر دی گئی ہے۔

اس کے ساتھ ہی حکومت نے پیٹرولیم لیوی میں بھی 2 روپے 50 پیسے فی لیٹر کمی کر دی ہے۔ حکام کے مطابق یہ کمی کلائمیٹ سپورٹ لیوی میں کیے گئے اضافے کو ایڈجسٹ کرنے کے لیے کی گئی ہے۔

حکومت کا کہنا ہے کہ دونوں لیویز میں کی گئی اس ایڈجسٹمنٹ کے باعث صارفین پر کوئی اضافی مالی بوجھ نہیں پڑے گا، کیونکہ پیٹرول اور ڈیزل کی قیمتوں میں کوئی تبدیلی نہیں کی گئی۔

حکام کے مطابق نئے مالی سال کے آغاز پر لیویز کی شرح میں یہ ردوبدل حکومتی مالیاتی پالیسی کے تحت کیا گیا ہے، جبکہ عوام کے لیے پیٹرولیم مصنوعات کی موجودہ قیمتیں بدستور برقرار رہیں گی۔