اردوورلڈکینیڈا(ویب نیوز)ایران نے اپنی سرزمین پر امریکا کے تازہ حملوں کی سخت مذمت کرتے ہوئے کہا ہے کہ ان حملوں نے گزشتہ چند ماہ کے دوران جاری تمام سفارتی کوششوں کو ناکام بنا دیا ہے۔
ایرانی وزارت خارجہ کے مطابق امریکا نے آبنائے ہرمز میں ایران کے ضروری انتظامات میں کھلی مداخلت کی، جس کے نتیجے میں نہ صرف وہاں دوبارہ عدم تحفظ کی صورتحال پیدا ہوئی بلکہ بین الاقوامی تجارتی جہاز رانی بھی متاثر ہوئی۔
وزارت خارجہ کا کہنا ہے کہ ہفتے کے روز عمان کے دارالحکومت مسقط میں ہونے والے مذاکرات کا مرکزی موضوع آبنائے ہرمز کا انتظام تھا، تاہم امریکا نے عمان پر دباؤ ڈال کر اس معاملے میں کسی بھی پیش رفت کو روک دیا۔
ایران کے نائب وزیر خارجہ کاظم غریب آبادی نے کہا کہ ایرانی مسلح افواج سپریم نیشنل سکیورٹی کونسل اور ایرانی پارلیمان کے فیصلوں کے مطابق ان حملوں کا جواب دینے کی پابند ہیں۔ انہوں نے کہا کہ ایران کے خلاف کسی بھی اقدام کو جواب کے بغیر نہیں چھوڑا جائے گا۔
وزارت خارجہ کے اتوار کی صبح جاری ہونے والے بیان میں کہا گیا کہ یہ حملے اقوام متحدہ کے منشور، بالخصوص آرٹیکل 2 کی شق 4، کی کھلی خلاف ورزی ہیں اور بین الاقوامی امن و سلامتی کے لیے سنگین خطرہ ہیں۔
بیان میں مزید الزام عائد کیا گیا کہ امریکا نے بعض خلیجی ممالک کی سرزمین اور تنصیبات کو ایران کے خلاف فوجی کارروائیوں کے لیے استعمال کیا۔
ایرانی وزارت خارجہ نے متعلقہ خلیجی ممالک کو امریکا کے ساتھ کسی بھی قسم کے تعاون سے گریز کرنے کی تنبیہ کرتے ہوئے کہا کہ وہ بین الاقوامی قانون کی پابندی کریں، بصورت دیگر ایسی تنصیبات ایرانی دفاعی کارروائیوں کے لیے جائز اہداف سمجھی جا سکتی ہیں۔
