رکن قومی اسمبلی عامر لیاقت آج 49 برس کی عمر میں انتقال کر گئے۔
عامر لیاقت حسین 5 جولائی 1971 کو کراچی میں پیدا ہوئے۔
عامر لیاقت حسین نے جیو ٹیلی ویژن کے پروگرام عالم آن لائن سے شہرت حاصل کی اور جیو کی رمضان ٹرانسمیشن اور انعام گھر سے ان کی شہرت میں اضافہ ہوا۔ وہ جیو ٹی وی سمیت مختلف میڈیا گروپس سے وابستہ رہے۔
عامر لیاقت نے اپنی عملی سیاست کا آغاز متحدہ قومی موومنٹ سے کیا اور پہلی بار ایم کیو ایم کے ٹکٹ پر رکن قومی اسمبلی منتخب ہوئے۔
عامر لیاقت 2002 سے 2007 تک رکن قومی اسمبلی رہے اور سابق صدر مشرف کے دور میں وزیر مملکت بھی رہے۔
متحدہ قومی موومنٹ کے بعد عامر لیاقت نے پاکستان تحریک انصاف (پی ٹی آئی) میں شمولیت اختیار کی اور 2018 کے عام انتخابات میں پی ٹی آئی کے ٹکٹ پر رکن قومی اسمبلی منتخب ہوئے۔
عامر لیاقت نے تین شادیاں کیں، ان کی پہلی بیوی سیدہ بشری تھی اور ان کے دو بچے ہیں جن میں ایک بیٹا احمد اور ایک بیٹی دعا ہے۔ تاہم 2020 میں بشری نے عامر لیاقت سے علیحدگی کی تصدیق کی۔
عامر لیاقت نے دسمبر 2018 میں اپنی دوسری شادی کی تصدیق کی تھی، ان کی دوسری شادی طوبی انور سے ہوئی تھی لیکن یہ شادی زیادہ دن نہ چل سکی اور طوبی نے فروری 2022 میں عامر لیاقت سے علیحدگی کی تصدیق کی۔
فروری 2022 میں عامر لیاقت نے دانیہ شاہ سے تیسری شادی کی لیکن 3 ماہ بعد دانیہ نے منسوخی کی درخواست دائر کر دی۔
