اردو ورلڈ کینیڈا ( ویب نیوز)بلوچستان کے مختلف علاقوں میں حالیہ مون سون بارشوں اور سیلاب سے ہلاکتوں کی تعداد 304 ہو گئی، مزید تین افراد جاں بحق ہو گئے۔
پراونشل ڈیزاسٹر مینجمنٹ اتھارٹی (پی ڈی ایم اے) کے مطابق بلوچستان کے مختلف علاقوں میں حالیہ مون سون بارشوں اور سیلاب سے مرنے والوں کی تعداد 304 ہو گئی ہے، جن میں 138 مرد، 74 خواتین اور 92 بچے شامل ہیں۔
پی ڈی ایم اے نے بتایا کہ شدید بارشوں سے کم از کم 305,155 مویشیوں کا نقصان ہوا۔ پی ڈی ایم اے نے بتایا کہ صوبے میں بارشوں اور سیلاب سے 20,027 مکانات مکمل طور پر تباہ ہوئے جبکہ 52,208 مکانات کو جزوی نقصان پہنچا۔
پی ڈی ایم اے نے بتایا کہ سیلاب سے 2,198 کلومیٹر لمبی سڑکیں اور 24 پلوں کو نقصان پہنچا جبکہ 200,936 ایکڑ رقبے پر کھڑی فصلیں بھی تباہ ہوئیں۔ پی ڈی ایم اے متاثرہ اضلاع میں امدادی کارروائیاں کر رہی ہے۔
