اردو ورلڈ کینیڈا ( ویب نیوز )لانگ مارچ کی اجازت -آئی جی اسلام آباد نے پاکستان تحریک انصاف کے احتجاج اور لانگ مارچ سے متعلق اسلام آباد ہائی کورٹ میں رپورٹ جمع کراتے ہوئے پی ٹی آئی سے مالی ضمانتیں طلب کرنے کی سفارش کر دی۔
ہائی کورٹ میں جمع کرائی گئی تفصیلی رپورٹ میں آئی جی اسلام آباد نے کہا کہ پی ٹی آئی نے گزشتہ مارچ کے دوران معاہدے کی خلاف ورزی کی اور علی امین گنڈا پور اور پی ٹی آئی کے دیگر رہنما ئوں کے اشتعال انگیز بیانات بھی رپورٹ کا حصہ ہیں۔
رپورٹ میں مزید کہا گیا ہے کہ پی ٹی آئی کے ایک رہنما نے وزیر داخلہ کو دھمکی دی جبکہ شیخ رشید اور فیصل واوڈا کہہ چکے ہیں کہ لانگ مارچ خونی ہوسکتا ہے حتی کہ خود چیئرمین پی ٹی آئی نے اعتراف کیا کہ ان کے کچھ لوگ مسلح ہیں۔
آئی جی اسلام آباد کی جانب سے درخواست کی گئی ہے کہ ایئرپورٹ جانے والی سڑکوں پر وفاقی ادارے کے اہلکار تعینات کیے جائیں۔
رپورٹ میں مزید کہا گیا ہے کہ اگر پی ٹی آئی مطلوبہ ضمانت دے تو کنٹینرز لگا کر سڑکیں بلاک کرنے کی بھی ضرورت نہیں پڑے گی۔
