اردو ورلڈ کینیڈا ( ویب نیوز )اسلام آباد کی ضلعی انتظامیہ نے پی ٹی آئی کے چیئرمین اور سابق وزیراعظم عمران خان کو 26 نومبر کے فیض آباد جلسے کے لیے پریڈ گراؤنڈ میں اپنا ہیلی کاپٹر اتارنے کی اجازت دینے سے انکار کر دیا۔
وفاقی حکومت نے اسلام آباد میں دفعہ 144 کے نفاذ میں مزید دو ماہ کی توسیع کر دی ہے۔ ضلع مجسٹریٹ نے اس سلسلے میں نوٹیفکیشن جاری کر دیا ہے۔
قبل ازیں جی ایچ کیو نے سابق حکمران جماعت کو مطلع کیا تھا کہ اسے ایک ہیلی کاپٹر کی لینڈنگ اور ٹیک آف پر کوئی اعتراض نہیں، جو پی ٹی آئی کے سربراہ کو لاہور سے اسلام آباد لے جائے گا جی ایچ کیو نے کہا کہ پی ٹی آئی کو دارالحکومت کی انتظامیہ سے رجوع کرنا چاہیے چونکہ گرائونڈ وفاقی حکومت کے اختیار میں ہے
لیفٹیننٹ کرنل راؤ فرمان علی نے پی ٹی آئی کے ایڈیشنل جنرل سیکرٹری عمر ایوب کو خط جاری کیا جس میں کہا گیا کہ جنرل ہیڈ کوارٹرز کو متعلقہ حکام کی منظوری سے مشروط ہیلی کاپٹر کی جگہ کی درخواست پر کوئی اعتراض نہیں ہے”۔
اس کے علاوہ، جی ایچ کیو کے خط میں کہا گیا ہے کہ "یہ مطلع کیا جاتا ہے کہ کیپیٹل ڈویلپمنٹ اتھارٹی/وفاقی حکومت سے رابطہ کیا جا سکتا ہے کیونکہ پریڈ گراؤنڈ ان کے دائرہ اختیار میں ہے”۔
یہ خط سی ڈی اے، انسپکٹر جنرل آف پولیس، چیف کمشنر اسلام آباد، کمشنر، ڈپٹی کمشنر، سٹی پولیس آفیسر راولپنڈی اور ملٹری آپریشن ڈائریکٹوریٹ کو بھیجا گیا تھا۔
اس سے قبل پی ٹی آئی اسلام آباد کے صدر علی نواز اعوان نے ضلعی انتظامیہ کو فیض آباد میں پی ٹی آئی کے عوامی اجتماع کی اجازت کے لیے درخواست جمع کرائی تھی۔
انہوں نے پریڈ گراؤنڈ میں عمران کے ہیلی کاپٹر کی لینڈنگ اور روانگی کے لیے دارالحکومت کی انتظامیہ سے منظوری بھی مانگی تھی۔
