اردو ورلڈ کینیڈا ( ویب نیوز)وزیراعلی پنجاب چوہدری پرویز الہی کا کہنا ہے کہ سابق آرمی چیف جنرل ریٹائرڈ قمر جاوید باجوہ کے عمران خان پر بہت احسانات ہیں، احسان فراموشی نہیں کرنا چاہیے۔

لاہور میں صحافیوں سے غیر رسمی گفتگو کرتے ہوئے پرویز الہی نے کہا کہ جب عمران خان جنرل باجوہ کے خلاف بول رہے تھے تو مجھے بہت برا لگا۔

انہوں نے کہا کہ جنرل باجوہ ہمارے محسن ہیں،  محسنوں کے خلاف نہیں بولنا چاہیے، جنرل باجوہ کے ان پر بہت احسان ہیں، احسان فراموشی نہیں کرنا چاہیے۔

پرویز الہی نے کہا کہ آئندہ  جنرل باجوہ کے خلاف بات ہوئی تو پہلے میں  بولوں گا، میری پوری پارٹی بولے گی، ہم عمران خان اور پی ٹی آئی کے مخالف نہیں ساتھی ہیں، لیکن اپنے محسنوں کو نہیں بھول سکتے۔

وزیراعلی پنجاب کا کہنا تھا کہ جنرل ریٹائرڈ فیض حمید نے  ہمیں گرفتار کرنے کی کوشش کی ، وہ ہمارے خلاف تھے، عمران خان مونس الہی کے ساتھ بھی نہیں بیٹھے، اس کے باوجود ہم نے عمران خان کو سپورٹ کیا، جب عمران خان نے اسمبلی توڑ نے کا کہا تو ہم نے فورا یقین دہانی کرائی ۔