اردو ورلڈ کینیڈا ( ویب نیوز)وزیراعظم شہباز شریف نے کہا ہے کہ جب گیس سستی تھی تو پی ٹی آئی نے نرخ کم نہیں کیے، سرکلر ڈیٹ ڈریگن بن گیا، مسائل کا پہاڑ 8 ماہ میں حل نہیں ہوسکتا، حکومت کو مزید وقت چاہیے۔
سولر انرجی کے حوالے سے منعقدہ کانفرنس سے خطاب کرتے ہوئے شہباز شریف کا کہنا تھا کہ پی ٹی آئی حکومت نے گیس سستی ہونے پر نہیں خریدی، روس یوکرائن جنگ کی وجہ سے عالمی سطح پر پیٹرول کی قیمتیں بڑھیں، جب بہاولپور میں پہلا سولر پارک بنایا گیا تھا۔ جب سنگ بنیاد رکھا گیا تو بہت تنقید ہوئی، قائداعظم سولر پارک کو انتہائی شفاف طریقے سے لگایا گیا، قائداعظم سولر پارک کا کریڈٹ نواز شریف کو جاتا ہے، نواز شریف کے دور میں ترقی ہوئی۔
وزیراعظم نے کہا کہ ہماری معیشت کے منصوبے اڑ گئے، سولر پاور کے ذریعے متبادل توانائی کا بندوبست کریں گے۔
کانفرنس سے خطاب کرتے ہوئے وزیراعظم نے کہا کہ سرکاری عمارتوں کو سولر انرجی پر منتقل کیا جائے گا، سولر انرجی کے ذریعے متبادل توانائی کا بندوبست کیا جائے گا، سولر انرجی سے سستی بجلی پیدا کی جائے گی، ملک میں اس وقت ایک ایک ڈالر قیمتی ہے۔ اگر وفاقی اداروں کو شمسی توانائی سے چلایا جائے تو یہ بہت بڑی قومی خدمت ہوگی۔
انہوں نے کہا کہ اتحادی حکومت ملک میں معاشی استحکام کے لیے کوشاں ہے، مہنگی بجلی نے معیشت کا دھڑن تختہ کر دیا، آئی ایم ایف پروگرام کے بغیر زندگی نہیں گزرسکتی ، 27 ارب تیل اور گیس کی درآمد پر جاتے ہیں، ترقی اور خوشحالی کہاں سے آئے گی۔
شہباز شریف نے کہا کہ ایک لاڈلا تیار کیا جا رہا تھا، اس لیے مسلم لیگ کے خلاف بے بنیاد پروپیگنڈا کیا گیا، طوفان بدتمیزی کیا گیا، ہمارے اچھے کاموں پر بھی تنقید کی گئی، انہوں نے کہا کہ پنجاب کی 56 کمپنیاں کہاں گئیں؟ ، 5 سال ہو گئے اور ایک دھیلے کی کرپشن ثابت نہیں ہو سکی۔
وزیراعظم نے کہا کہ پاکستان کی تیز رفتار ترقی پروپیگنڈے سے روکی گئی۔ انشاء اللہ حالات ٹھیک ہونے میں وقت لگے گا۔
