153
اردو ورلڈ کینیڈا ( ویب نیوز)پنجاب کے مختلف علاقوں میں شدید دھند کے باعث موٹر ویز سمیت اہم شاہراہیں بند ہوگئیں جب کہ موٹروے پولیس نے سفر کرنے والے شہریوں کے لیے اہم ہدایات بھی جاری کردیں۔
ترجمان موٹروے پولیس کے مطابق موٹروے ایم 11 لاہور سے سیالکوٹ جبکہ لاہور ملتان موٹروے فیض پور سے درخانہ تک دھند کے باعث بند کردی گئی ہے۔
ترجمان موٹرویز سید عمران احمد نے بتایا کہ موٹروے ایم 2 لاہور سے کوٹ مومن تک جبکہ موٹروے ایم 4 گوجرہ سے عبدالحکیم تک بند ہے۔
سید عمران احمد نے کہا کہ موٹرویز عوام کے تحفظ اور محفوظ سفر کو یقینی بنانے کے لیے بند ہیں، سڑک استعمال کرنے والے آگے اور پیچھے فوگ لائٹس استعمال کریں اور غیر ضروری سفر سے گریز کریں۔
عمران احمد نے مزید کہا کہ روڈ یوزرز معلومات اور مدد کے لیے ہیلپ لائن 130 پر رابطہ کریں جب کہ موٹروے پولیس ہمسفر ایپ سے بھی معلومات حاصل کی جا سکتی ہیں۔
