اردو ورلڈ کینیڈا ( ویب نیوز )متعصب بھارتی میڈیا نے اپنے سلیکٹرز کو مشورہ دیا کہ وہ قومی کرکٹ ٹیم کے سابق کپتان اور عبوری سلیکشن کمیٹی کے چیئرمین شاہد آفریدی سے سبق لیں۔
بورڈ آف کرکٹ ان انڈیا کے حکام کو پاکستان کی عبوری سلیکشن کمیٹی کے سربراہ شاہد آفریدی کی پریس کانفرنس سے سوالوں کے جواب دینے کا طریقہ سیکھنے کی ضرورت ہے، انہوں نے اعتراف کیا کہ بابر اعظم کو بطور کپتان بہتر کرنے کی ضرورت ہے۔
رپورٹ میں بھارتی کرکٹ بورڈ کے حکام کو آڑے ہاتھوں لیتے ہوئے کہا گیا کہ بھارتی بورڈ کے کرتا دھرتائوں کو شاہد آفریدی سے میڈیا کے سخت سوالات کے جوابات سیکھنا چاہیے، کرکٹ کے مسائل اور کپتان کے بارے میں کھل کر بات کرنا چاہیے۔
بھارت کے پاس 10 سابق کرکٹرز ہیں جنہوں نے 100 سے زائد ٹیسٹ میچز کھیلے ہیں لیکن ٹیم کے انتخاب کا سب سے اہم فیصلہ ایسے لوگوں کو کرنا ہے جن کے پاس تجربہ نہیں ہے، بی سی سی آئی کی سلیکشن کمیٹی کپتان اور کوچ سے کم بین الاقوامی تجربہ رکھتی ہے۔
بھارتی میڈیا نے مشورہ دیا کہ سلیکٹرز کی کرسی پر وینکٹیش پرساد یا چیتن شرما جیسے نام ہیں لیکن وہ ویرات کوہلی، روہت شرما اور راہول ڈریوڈ سے بہت پیچھے ہیں، کیا یہ انتظامیہ پلیئنگ الیون کا انتخاب کرسکتی ہے؟
ہندوستانی کرکٹ کو شاہد آفریدی کی پریس کانفرنس سے وضاحت، صاف گوئی اور یقین سیکھنے کی اشد ضرورت ہے تاکہ وہ ایک بہتر ٹیم چن سکیں اور نوجوان کھلاڑیوں کو مواقع فراہم کر سکیں۔
