اردو ورلڈ کینیڈا ( ویب نیوز)چیئرمین پاکستان تحریک انصاف اور سابق وزیراعظم عمران خان کی گرفتاری کے خدشے کے پیش نظر پی ٹی آئی کے کارکنوں کی بڑی تعداد رات گئے زمان پارک کے باہر جمع ہوگئی۔
پی ٹی آئی کے آفیشل ٹوئٹر اکاؤنٹ نے پارٹی چیئرمین کی گرفتاری کے خدشے کے پیش نظر کارکنوں کو زمان پارک کے باہر جمع ہونے کی ہدایت کردی۔
زمان پارک کے باہر جمع ہونے والے کارکنوں نے سابق وزیراعظم کے حق میں اور وفاقی حکومت کے خلاف نعرے لگائے۔
اس موقع پر میڈیا سے بات کرتے ہوئے پی ٹی آئی رہنما اور سابق وفاقی وزیر حماد اظہر نے کہا کہ عمران خان کی گرفتاری کے لیے ماحول بنایا جا رہا ہے، حکومت ہوشیار ہو اور گرفتاری کا فیصلہ کرنے سے پہلے سو بار سوچے۔ عمران خان کی حفاظت کے لیے کارکن تعینات کیے گئے ہیں۔
اطلاعات ہیں کہ کٹھ پتلی حکومت آج رات چئیرمین عمران خان کو گرفتار کرنے کی کوشش کرے گی
تحریک انصاف کے کارکنان اپنے لیڈر کی حفاظت کے لیے زمان پارک پہنچ رہے ہیں
— PTI (@PTIofficial) January 24, 2023
انہوں نے کہا کہ یقین دلانا ہوگا کہ عمران خان زمان پارک میں محفوظ رہیں گے، کسی میں عمران خان کو گرفتار کرنے کی جرات نہیں ہے۔
ادھررات دیر گئے فواد چوہدری کی گرفتار ی عمل میں لائی گئ،اطلاعات ہیں کہ فواد چوہدری کو اسلام آباد لے جایا گیا ہے۔
