177
اردو ورلڈ کینیڈا ( ویب نیوز)راولپنڈی کی عدالت نے شیخ رشید کی لال حویلی خالی کرنے سے روکنے کی درخواست مسترد کر دی۔
راولپنڈی کی سول جج نوید اختر کی عدالت نے شیخ رشید کی حکم امتناعی کی درخواست خارج کرتے ہوئے کہا کہ عدالت کسی ادارے کو قانون کے مطابق کارروائی سے نہیں روک سکتی۔ عدالت نے آئندہ سماعت 15 فروری کو مقرر کرتے ہوئے فریقین کو طلب کر لیا۔
شیخ رشید کی جانب سے دائر حکم امتناعی کی درخواست میں کہا گیا ہے کہ لال حویلی کیس اور متروکہ وقف املاک کے فیصلے کے خلاف اپیلیں زیر التوا ہیں۔ لال حویلی کو زبردستی خالی کروانا غیر قانونی اور سیاسی انتقام ہے۔
درخواست میں عدالت سے استدعا کی گئی کہ محکمہ متروکہ وقف املاک سیاسی انتقامی کارروائیاں کر رہا ہے لہٰذا لال حویلی خالی کرانے سے روکا جائے۔
