اردو ورلڈ کینیڈا ( ویب نیوز)سابق وزیراعظم عمران خان نے کہا ہے کہ قائداعظم آئین کے امین تھے، اسی لیے ہماری ریاست کی بنیاد آئین پاکستان ہے۔

چیئرمین پاکستان تحریک انصاف عمران خان نے سوشل میڈیا ویب سائٹ ٹوئٹر پر اپنے بیان میں کہا ہے کہ قرارداد مقاصد میں واضح طور پر کہا گیا ہے کہ بادشاہت صرف اللہ رب العزت کی ہے۔
انہوں نے اپنے ٹویٹ میں مزید کہا کہ ریاست پاکستان اس مقدس امانت کو عوام کے منتخب نمائندوں کے ذریعے استعمال کرے گی، انتخابات میں آئینی مدت سے انحراف ریاست کی بنیاد ہلانے کے مترادف ہے۔
عمران خان نے کہا کہ آج پوری قوم آئین کے تحفظ کے لیے عدلیہ کی طرف دیکھ رہی ہے، 90 دن میں انتخابات کا انعقاد آئینی تقاضا ہے اور اس سے کوئی انحراف آرٹیکل 6 کی خلاف ورزی ہو گا۔