اردو ورلڈ کینیڈا (ویب نیوز)شمالی وزیرستان میں سیکیورٹی فورسز کی کارروائی کے دوران خودکش حملہ آور، اس کے ساتھی اور 4 سہولت کاروں کو گرفتار کرلیا گیا۔

سیکیورٹی ذرائع کے مطابق گرفتار سہولت کاروں کا تعلق ہرمز، سپین وام، کھدری اور میر علی کے دیہات سے ہے۔

گرفتار دہشت گردوں کو تفتیش کے لیے نامعلوم مقام پر منتقل کر دیا گیا ہے جب کہ گرفتار دہشت گردوں اور سہولت کاروں نے اعتراف جرم کر لیا ہے۔

سرکاری ذرائع کے مطابق شمالی وزیرستان میں رواں سال اب تک دہشت گردوں کے 28 سہولت کاروں کو گرفتار کیا جا چکا ہے، گرفتار دہشت گردوں سے ملنے والی معلومات کے بعد مزید گرفتاریاں متوقع ہیں۔

سرکاری ذرائع کا کہنا ہے کہ گرفتار دہشت گردوں میں سے زیادہ تر کرک، ہنگو، کرم اور تل کے مدارس میں تعلیم حاصل کرتے تھے۔

سیکیورٹی حکام نے والدین سے اپیل کی ہے کہ وہ اپنے بچوں کو مدارس میں داخل کرتے وقت تحقیقات کے بعد مدارس کا انتخاب کریں۔