اردو رلڈ کینیڈا ( ویب نیوز )مسلم لیگ ن کی سینئر نائب صدر مریم نواز شریف نے سابق ڈی جی آئی ایس آئی لیفٹیننٹ جنرل (ر) فیض حمید کے کورٹ مارشل کا مطالبہ کر دیا۔
ایک ویب چینل کو انٹرویو دیتے ہوئے مریم نواز نے کہا کہ فیض حمید نے مسلم لیگ ن کی 2 سال حکومت گرانے اور 4 سال عمران حکومت کا ساتھ دے کر ملک کو تباہ کرنے میں کردار ادا کیا، اس لیے سابق ڈی جی آئی ایس آئی لیفٹیننٹ جنرل ریٹائرڈ فیض حمید کا کورٹ مارشل ہونا چاہیے۔
مریم نواز نے کہا کہ سابق ڈی جی آئی ایس آئی فیض حمید کو غیر آئینی کردار ادا کرنے پر عبرت کا نشان بنایا جائے تاکہ آئندہ کسی کو ایسی جرات نہ ہو۔
انہوں نے کہا کہ ہائبرڈ سسٹم لانے والوں کے لیے سب سے بڑی سزا ووٹ کو عزت دو کی شکل میں عوامی آگاہی مہم تھی
مریم نواز نے کہا کہ نواز شریف نے بہت اچھے طریقے سے لوگوں کو باور کرایا کہ ان کے آئینی کردار کے اندر سب کچھ اچھا ہے اور جو بھی آئینی کردار سے ہٹ کر کچھ کرے گا اسے قیمت چکانی پڑے گی۔
انہوں نے کہا کہ میں غیر آئینی کردار ادا کرنے والے عناصر پر تنقید کرتی ہوں لیکن میں کسی ادارے کو نشانہ بنانے کے حق میں نہیں، میں سمجھتی ہوں کہ اداروں کو بھی ایسے تمام افراد کو سزا دینی چاہیے اور ان کا احتساب کرنا چاہیے۔ جو اداروں کی بدنامی کا باعث بنتے ہیں۔ اس عمل سے اداروں کی عزت و تکریم میں اضافہ ہوگا اور اس سے ان کی نیک نامی ہوگی۔
انہوں نے کہا کہ سابق چیف جسٹس ثاقب نثار آج بھی متحرک ہیں اور اب وہ کتنا ہی جھوٹ بولیں، قوم ان کے بارے میں سب کچھ اچھی طرح جانتی ہے۔ میرا ماننا ہے کہ ثاقب نثار اس قوم کا سب سے بڑا مجرم ہے۔
مریم نواز نے کہا کہ ثاقب نثار انصاف کی سب سے بڑی کرسی پر بیٹھے تھے لیکن ایک کرنل اور ایک بریگیڈیئر انہیں ہدایات دیتے تھے۔ جنرل فیض انہیں ہدایات دیتے تھے اور وہ ان سے ملنے سے انکار نہیں کرتے تھے۔
