اردو ورلڈ کینیڈا ( ویب نیوز )خاتون جج زیبا چوہدری کو دھمکیاں دینے کے کیس میں سول جج نے پاکستان تحریک انصاف کے چیئرمین عمران خان کی حاضری سے استثنی کی درخواست مسترد کرتے ہوئے ناقابل ضمانت وارنٹ گرفتاری جاری کر دیئے۔
عمران خان کے وکیل نعیم پنجوٹھہ کی جانب سے ڈسٹرکٹ سیشن کورٹ میں سیکیورٹی خدشات کی بنیاد پر عمران خان کی حاضری سے استثنی کی درخواست دائر کی گئی۔
سول جج رانامجاہد رحیم نے کہا کہ عمران خان آج نہ آئے تو وارنٹ جاری کریں گے۔
جج کو دھمکی کا کیس، عمران خان پیش نہ ہوئے ، وارنٹ جاری کرینگے ،عدالت کا عندیہ
فاضل جج نے کہا کہ اگر عمران خان عدالتی اوقات میں پیش نہ ہوئے تو ناقابل ضمانت وارنٹ گرفتاری جاری کریں گے۔ عدالت نے کیس کی سماعت ساڑھے 12 بجے تک ملتوی کر دی۔
وقفے کے بعد جب سماعت شروع ہوئی تو سول جج رانامجاہد رحیم نے کہا کہ عدالت نے فرد جرم کی کارروائی آگے بڑھانے کے لیے عمران خان کو طلب کیا ہے۔
وکیل صفائی انتظار پنجوٹھہ نے کہا کہ عمران خان سابق وزیراعظم ہیں، وزیر آباد میں ان پر قاتلانہ حملہ ہوا، عمران خان ابھی مکمل صحت یاب نہیں ہوئے، عمران خان پر ایک اور قاتلانہ حملہ ہوسکتا ہے، سابق وزیراعظم بھاگنے والے نہیں عمران خان کی آج حاضری سے استثنی کی درخواست منظور کی جائے۔
بعد ازاں عدالت نے عمران خان کی حاضری سے استثنی کی درخواست پر فیصلہ محفوظ کرلیا۔
واضح رہے کہ عدالت نے عمران خان کو کیس کی نقول دینے کے لیے آج طلب کر رکھا تھا۔
واضح رہے کہ عمران خان کے خلاف خاتون جج کو دھمکیاں دینے کے معاملے میں تھانہ مارگلہ میں مقدمہ درج کیا گیا ہے۔
