اردو ورلڈ کینیڈا ( ویب نیوز)عمران خان کی ممکنہ گرفتاری .چیئرمین پاکستان تحریک انصاف عمران خان کی عدالت میں پیشی کے موقع پر ممکنہ گرفتاری کے پیش نظر پی ٹی آئی نے چیف جسٹس کو خط لکھا ہے۔
پاکستان تحریک انصاف کے جنرل سیکریٹری اسد عمر نے پی ڈی ایم حکومت کی جانب سے عمران خان کی غیر قانونی گرفتاری کے امکان کے تناظر میں چیف جسٹس عمر عطا بندیال کو خط لکھا ہے۔
چیف جسٹس کو لکھے گئے خط میں پی ٹی آئی نے موقف اختیار کیا کہ عمران خان عدالت میں پیشی کے لیے اسلام آباد آرہے ہیں، پی ڈی ایم حکومت عمران خان کو انتقام کا نشان بنانا چاہتی ہے، عدالتی احکامات کا احترام کرتے ہیں
اسد عمر نے لکھا کہ عمران خان کو گزشتہ روز لاہور ہائیکورٹ سے 9 مقدمات میں ضمانت ملی، سپریم کورٹ نے حکام کو عمران خان کے خلاف ظالمانہ انتقامی کارروائیوں سے منع کیا، پولیس نے ان کی رہائش گاہ پر عدالتی احکامات کو پامال کیا۔ عمران خان کی رہائش گاہ پر حملے کے دوران گھر کے دروازے توڑ د ئیے گئے اور دیواریں گرا دی گئیں۔
عمران خان کی ممکنہ گرفتاری کے خلاف تحریک انصاف کا مختلف شہروں میں بھر پور احتجاج
انہوں نے لکھا کہ پولیس نے اسلام آباد میں خوف و ہراس کا بدترین ماحول پیدا کر رکھا ہے، میڈیا اور وکلا سمیت اہم لوگوں کو عدالت میں داخلے سے روک دیا گیا ہے، چیئرمین تحریک انصاف کو نامعلوم کیس میں گرفتار کرنے کے عزائم واضح ہیں۔
عمران خان اپنی جان کو لاحق خطرات کے بارے میں مسلسل آگاہ کر رہے ہیں۔
اسد عمر نے چیف جسٹس آف پاکستان سے استدعا کی کہ عدالت چیئرمین تحریک انصاف کی جان اور بنیادی حقوق کے تحفظ کے لیے فوری نوٹس لے۔
