اردو ورلڈ کینیڈا ( ویب نیوز ) نگران وزیر اعلیٰ پنجاب نے زمان پارک واقعے کی تحقیقات کے لیے جے آئی ٹی بنانے کا اعلان کر دیا۔
لاہور میں پریس کانفرنس کرتے ہوئے نگرا ن وزیراعلی پنجاب محسن نقوی نے کہا ہے کہ گزشتہ 5 سے 7 روز میں ہونے والے واقعات پر جے آئی ٹی بنانے کا فیصلہ کیا گیا ہے، تمام چیزوں کی تحقیقات کی جائیں گی
محسن نقوی نے کہا ہے کہ ہمیں ہر حال میں حکومتی رٹ قائم کرنی ہے، جہاں سے بھی مسائل آ رہے ہیں ان کو حل کرنے کی کوشش کر رہے ہیں۔
انہوں نے کہا ہے کہ عمران خان کی رہائش گاہ زمان پارک میں دہشت گرد موجود ہیں، آئی جی سے پی ٹی آئی کو ڈیڈ لائن دینے کا کہا، آئی جی سے کہا کہ آپ کو کھلی چھٹی ہے کوئی ہاتھ اٹھائے گا تو ہاتھ توڑ دیں گے۔
محسن نقوی نے کہا کہ پی ٹی آئی رہنمائوں نے پولیس کی گاڑی کی توڑ پھوڑ کی، پولیس اہلکاروں کا اسلحہ چھین لیا گیا، کوئی سیاسی کارکن ایسی حرکت نہیں کرتا، زمان پارک میں پنجاب سے باہر کے لوگ آئے ہیں۔نگران وزیراعلی پنجاب نے کہا کہ پولیس نے زمان پارک کو کلیئر کرایا اور ٹریفک کو رواں دواں رکھا۔
انہوں نے کہا کہ وہ اپنی پولیس فورس کے شانہ بشانہ کھڑے ہوں گے، قانون توڑنے والے سے کوئی رعایت نہیں برتی جائے گی، پولیس کو قانونی کارروائی کرنے کی ہدایات دی ہیں، ایسی حرکتوں کی اجازت نہیں دی جائے گی۔ .
محسن نقوی نے کہا کہ عمران خان کارکنوں سے کہتے ہیں پولیس کو مارو، عمران خان دھمکی دینا چاہتے ہیں تو سیکیورٹی واپس کر دیں، پولیس سیکیورٹی دے اور گالی بھی دے تو ایسا نہیں ہوگا، پولیس گالی کھا کر سیکورٹی نہیں دے سکتی۔
