اردو ورلڈ کینیڈا( ویب نیوز) رمضان کے مہینے میں روزہ سحری سے شروع ہوتا ہے اور غروب آفتاب پر ختم ہوتا ہے۔لیکن جب کوئی مسلمان خلا میں روزہ رکھتا ہو تو کیا ہوتا ہے؟ رواں سال متحدہ عرب امارات (یو اے ای) سے تعلق رکھنے والے سلطان النیادی بین الاقوامی خلائی اسٹیشن (آئی ایس ایس) پر روزہ رکھیں گے۔

بین الاقوامی خلائی اسٹیشن 17000 میل فی گھنٹہ کی رفتار سے زمین کے گرد چکر لگا رہا ہے اور اس کے مکین دن میں 16 بار سورج کو طلوع اور غروب ہوتے دیکھ سکتے ہیں۔تو وہاں سلطان النیادی کا روزہ کب تک رہے گا؟فروری میں جب ان سے یہی سوال پوچھا گیا تو انہوں نے کہا کہ وہ گرین وچ مین ٹائم کے مطابق روزہ رکھ سکتے ہیں۔

انہوں نے کہا کہ موقع ملا تو رمضان کے روزے ضرور رکھوں گا اور یہ صحت کے لیے بھی فائدہ مند ہے۔ویسے، سلطان النیادی بین الاقوامی خلائی اسٹیشن پر روزہ رکھنے والے پہلے مسلمان نہیں ہیں۔ 2007 میں، ملائیشیا کے خلاباز شیخ مظفر شکور رمضان کے دوران آئی ایس ایس پر قیام کرنے والے پہلے مسلمان خلاباز بنے۔

ان کے لیے ملیشیا کی قومی فتویٰ کونسل نے آئی ایس ایس میں عبادت کے لیے خصوصی ہدایات مرتب کی تھیں۔ ان ہدایات میں کہا گیا تھا کہ شیخ مظفر زمین پر واپسی تک روزہ نہ رکھیں یا اس جگہ کے روزے کا شیڈول اپنائیں جہاں سے راکٹ خلا کے لیے روانہ ہوا تھا۔ ہدایات کے مطابق خلاباز کو قبلہ کی سمت کا تعین اس کے مطابق کرنا چاہیے، اگر اس کا تعین کرنا مشکل ہو تو وہ زمین یا کسی بھی سمت منہ کر کے نماز پڑھے۔