اردو ورلڈ کینیڈا ( ویب نیوز )سعودی عرب کے ایران کے ساتھ تعلقات کے بعد شام کے ساتھ بھی تعلقات کی راہیں ہموار ہونے لگیں۔

  سعودی عرب اور شام نے ایک دہائی سے زائد عرصے سے منقطع باہمی تعلقات کی بحالی کے حصے کے طور پر سفارتخانے دوبارہ کھولنے پر اتفاق کیا ہے۔

خلیجی علاقائی اور سفارتی ذرائع نے خبر رساں ایجنسی کو بتایا کہ سعودی عرب اور شام عید الفطر کے بعد سفارتخانے دوبارہ کھولنے کی تیاری کر رہے ہیں۔سفارتی ذرائع کے مطابق سفارت خانہ کھولنے کا فیصلہ سعودی عرب میں شام کے سینئر انٹیلی جنس اہلکار سے بات چیت میں کیا گیا۔مشرق وسطیٰ کی سیاست میں اہم پیش رفت میں ایران اور سعودی عرب نے تعلقات کی بحالی پر اتفاق کیا ہے۔

دوسری جانب سعودی اور شامی حکام نے ابھی تک اس خبر پر کوئی تبصرہ نہیں کیا ہے۔واضح رہے کہ شام میں 2011 کی خانہ جنگی کے بعد سے بیشتر عرب ریاستوں نے شام سے تعلقات منقطع کر لیے ہیں۔گزشتہ دنوں مشرق وسطیٰ کی سیاست میں اہم پیش رفت اس وقت سامنے آئی جب ایران اور سعودی عرب نے سفارتی تعلقات کی بحالی پر اتفاق کیا۔