اردو ورلڈ کینیڈا ( ویب نیوز ) کینیڈا کے مصروف ترین ایئرپورٹ پیئرسن انٹرنیشنل ایئرپورٹ پر 15 ملین ڈالر (تقریباً چار سو چار ارب روپے) کا سونا چوری ہوگیا۔

بین الاقوامی میڈیا رپورٹس کے مطابق کینیڈین پولیس حکام نے بتایا کہ رواں ہفتے ٹورنٹو پیئرسن انٹرنیشنل ایئرپورٹ پر ہوائی جہاز سے کنٹینر اتارنے کے بعد ڈکیتی کی واردات ہوئی۔

ریجنل پولیس انسپکٹر سٹیفن ڈوسٹن نے بتایا کہ طیارہ معمول کے مطابق لینڈ کیا گیا جس کے بعد کنٹینر کو اتار کر ہولڈنگ کارگو میں لے جایا گیا۔
پولیس حکام نے بتایا کہ کنٹینر میں سونے کے علاوہ دیگر قیمتی اشیاء کی کھیپ بھی تھی۔ چوری کا واقعہ کنٹینر کو ہولڈنگ کارگو میں رکھنے کے فوراً بعد پیش آیا، جس پر پولیس کو کنٹینر کے گم ہونے کی اطلاع دی گئی۔

تاہم پولیس نے اس حوالے سے کوئی بیان جاری نہیں کیا کہ یہ کنٹینر کہاں سے آیا، اس کی آخری منزل کیا تھی اور اس میں سونے کے علاوہ کون سی قیمتی چیزیں تھیں۔