اردو ورلڈ کینیڈا ( ویب نیوز ) بھارتی پولیس کی جانب سے تشدد کا نشانہ بننے والے کشمیری کی موت کو خودکشی کا رنگ دینے کی کوششیں بے نقاب ۔

بھارتی میڈیا نے بھی اپنی صحافتی ذمہ داریاں نبھانے کے بجائے موت کو خودکشی قرار دینے میں فعال کردار ادا کیا۔

بھارتی صحافی منیش شرما کی آڈیو لیک نے خبر بریک کر دی، لیک ہونے والی آڈیو میں بھارتی صحافی کو اپنے ماتحتوں کو حقائق کو مسخ کرنے کی ہدایات دیتے سنا جا سکتا ہے۔ مقتول کے اہل خانہ نے واقعہ کے حوالے سے مجسٹریٹ کی انکوائری رپورٹ کو مسترد کرتے ہوئے کہا کہ تحقیقات میں حقائق کو توڑ مروڑ کر پیش کیا گیا۔

مقتول مختار شاہ کے بھائی کے مطابق مختار کے جسم پر تشدد کے نشانات ہیں، مختار کو پولیس نے تشدد کرکے شہید کیا۔ اس سے قبل مختار شاہ کا بھارتی پولیس کی جانب سے اپنے اوپر کیے جانے والے تشدد سے متعلق ویڈیو بیان بھی سوشل میڈیا پر وائرل ہوا تھا۔مختار شاہ کو پونچھ دھماکے میں ملوث ہونے کے الزام میں 21 اپریل کو گرفتار کیا گیا تھا۔