اردوورلڈ کینیڈا ( ویب نیوز )آئی ایس پی آر کے مطابق سیکیورٹی فورسز نے بلوچستان میں ایف سی کمپا ئونڈ مسلم باغ میں کلیئرنس آپریشن مکمل کرلیا۔
پاک فوج کے شعبہ تعلقات عا مہ کے مطابق کمپا ئونڈ میں موجود تمام 6 دہشت گردوں کو ہلاک کر دیا گیا ہے، جب کہ ایک شہری سمیت 7 جوان شہید اور خاتون سمیت 6 افراد زخمی ہوئے۔
آئی ایس پی آر کے مطابق دہشت گردوں کے ابتدائی حملے کو پسپا کرنے کے بعد گزشتہ شام شروع ہونے والے کلیئرنس آپریشن کے دوران یرغمالیوں کے 3 خاندانوں کو بھی بازیاب کرا لیا گیا ہے۔
سیکیورٹی فورسز نے مختلف کارروائیوں میں 7 عسکریت پسندوں کو ہلاک کردیا
آئی ایس پی آر کا کہنا تھا کہ پیچیدہ کلیئرنس آپریشن میں یرغمالیوں کی بازیابی شامل تھی، دہشت گردوں نے اپنے ہولناک حملے میں بچوں کو بھی نہیں بخشا۔
آئی ایس پی آر کے مطابق دہشت گردوں کے روابط کا سراغ لگانے کے لیے ضروری انٹیلی جنس فالو اپ جاری ہے، دہشت گردوں کے سہولت کاروں اور اسپانسرز کو گرفتار کیا جائے گا۔
آئی ایس پی آر کا کہنا ہے کہ سیکیورٹی فورسز بلوچستان کے امن، استحکام اور ترقی کی راہ میں حائل رکاوٹ کو شکست دینے کے لیے پرعزم ہیں۔
