اردوورلڈ کینیڈا ( ویب نیوز )چیئرمین پاکستان تحریک انصاف (پی ٹی آئی) عمران خان نے کہا ہے کہ 80 فیصد امکانات ہیں کہ اگر میں منگل کو اسلام آباد گیا تو مجھے گرفتار کر لیا جائے گا۔
امریکی نشریاتی ادارے کو انٹرویو دیتے ہوئے سابق وزیراعظم نے شدید خدشہ ظاہر کیا کہ منگل کو جب وہ ضمانت کے لیے عدالت جائیں گے تو اسلام آباد پولیس انہیں گرفتار کر لے گی۔
انہوں نے کہا کہ اس وقت قانون کی حکمرانی نہیں، خواتین اور سینئر رہنماؤں سمیت 10 ہزار سے زائد کارکنان ملک کی مختلف جیلوں میں نظر بند ہیں، سب کچھ ہماری جمہوریت کو تباہ کرنے کے لیے کیا جا رہا ہے۔
پی ٹی آئی حکومت کے خاتمے سے متعلق سوال کے جواب میں انہوں نے کہا کہ میری حکومت ختم کرنے کے ذمہ دار قمر باجوہ ہیں۔
ایک سوال کے جواب میں پی ٹی آئی چیئرمین نے کہا کہ مجھ پر قاتلانہ حملے کی وجہ یہ تھی کہ پی ڈی ایم کئی ضمنی انتخابات ہار چکی ہے اور پی ٹی آئی دن بدن مقبول ہوتی جارہی ہے، اس لیے مجھے معلوم تھا کہ میری جان کو خطرہ ہے اور مجھے اس کے بارے میں کھل کر بات کرنی تھی۔
انہوں نے خدشہ ظاہر کیا کہ حکومت اکتوبر میں بھی الیکشن نہیں کرائے گی، مجھے خدشہ ہے کہ یہ لوگ اس وقت الیکشن کرائیں گے جب یہ واضح ہو کہ پی ٹی آئی الیکشن نہیں جیتے گی۔
چیئرمین پی ٹی آئی نے کہا کہ حالات اس حد تک بگڑ چکے ہیں کہ ججز اور عدالتوں کے فیصلوں کو بھی مسترد کیا جا رہا ہے۔
