اردوورلڈ کینیڈا ( ویب نیوز )سندھ کے سابق گورنر عمران اسماعیل نے بھی پاکستان تحریک انصاف سے علیحدگی اختیار کر لی۔پریس کانفرنس کرتے ہوئے سابق گورنر سندھ کا کہنا تھا کہ آج میری آخری سیاسی پریس کانفرنس ہوسکتی ہے۔
عمران اسماعیل نے کہا کہ اللہ تعالی نے انہیں 2018 میں اقتدار میں آنے کا موقع دیا، انہوں نے اقتدار میں آنے کے بعد ڈیلیور کرنے کی کوشش کی، انہوں نے اقتدار میں آنے کے بعد عوامی مہم شروع کی، بیانیہ بنایا جانے لگا کہ تحریک انصاف فوج سے لڑ رہی ہے۔  بہت سے لوگ اس بیانیہ کے خلاف بھی تھے۔

سابق گورنر سندھ نے کہا کہ عمران خان صاحب میں آپ کو خدا حافظ کہتا ہوں، پاکستان تحریک انصاف کے تمام عہدوں سے استعفی دیتا ہوں۔
انہوں نے کہا کہ پی ٹی آئی کے قیام سے پہلے عمران خان سے رشتہ تھا، میں ان لوگوں میں شامل تھا جنہوں نے پی ٹی آئی کی بنیاد رکھی، ہم نے پاکستان کو اچھا بنانے کا خواب دیکھا تھا، وہ لوگ آج بیٹھ کر سوچیں کہ خان صاحب کو یہ آئیڈیا کس نے دیا۔
عمران اسماعیل نے کہا کہ عمران خان کی گرفتاری کے بعد ملک میں غداری شروع ہو جاتی ہے، 9 مئی کا دن بدنما دن تھا، 9 مئی کو کور کمانڈر جی ایچ کیو پر حملہ ہوا۔ ملوث افراد کو سزا ملنی چاہیے، ہمارے دل شہدا کے لیے دھڑکتے ہیں۔
انہوں نے کہا کہ میرے خاندان کا عسکری پس منظر نہیں ہے، میں بچپن سے پاک فضائیہ میں شامل ہونا چاہتا تھا۔
سابق گورنر سندھ کا کہنا تھا کہ وہ کسی ریلی یا احتجاج میں شامل نہیں تھے۔ 9 مئی میں ملوث افراد کو سزا دی جائے۔ آج میں تحریک انصاف کے تمام عہدوں سے استعفی دیتا ہوں اور پی ٹی آئی کو چھوڑتا ہوں، خان صاحب۔ اللہ آپ پر رحمت کرے.