اردو ورلڈکینیڈا ( ویب نیوز)انسداد دہشت گردی کی عدالت نے شادمان تھانے حملہ کیس میں پی ٹی آئی رہنما ڈاکٹر یاسمین راشد سمیت 34 ملزمان کی بعد از گرفتاری درخواست ضمانت پر سماعت 12 جون تک ملتوی کرنے کا حکم دے دیا۔

لاہور کی انسداد دہشت گردی کی عدالت کے جج اعجاز احمد بٹر نے یاسمین راشد اور دیگر 34 ملزمان کی درخواست ضمانت پر سماعت کی۔ استغاثہ نے عدالت کو بتایا کہ تفتیشی افسر اسلام آباد میں ہیں اور ان کے پاس کیس کا ریکارڈ موجود ہے۔ ملوث ملزمان کی درخواست ضمانت میں تاریخ دی جائے۔

بعد ازاں لاہور کی انسداد دہشت گردی کی عدالت نے کیس کا ریکارڈ طلب کرتے ہوئے درخواست ضمانت پر سماعت 12 جون تک ملتوی کردی۔

واضح رہے کہ ڈاکٹر یاسمین راشد کے وکیل میاں تبسم نے اپنے دلائل مکمل کر لیے، سابق صوبائی وزیر سمیت 34 ملزمان نے گرفتاری کے بعد ضمانت کی درخواستیں دائر کر رکھی ہیں۔

یاد رہے کہ تھانہ شادمان پولیس نے ڈاکٹر یاسمین راشد سمیت دیگر ملزمان کے خلاف مقدمہ نمبر 768/23 درج کر رکھا ہے۔ ملزمان پر شادمان تھانے کو آگ لگانے کا الزام ہے۔