اردو رلڈ کینیڈا ( ویب نیوز )سابق وفاقی وزیر غلام سرور خان نے بھی تحریک انصاف سے علیحدگی کا اعلان کردیا۔غلام سرور خان نے 9 مئی کے سانحہ کی مذمت کرتے ہوئے بیان دیتے ہوئے کہا کہ اس دن جو ہوا وہ برا تھا اس لیے پی ٹی آئی چھوڑنے کا اعلان کرتا ہوں۔
انہوں نے کہا کہ پاک افواج نے ملک کی بقاء اور سلامتی کے لیے قربانیاں دی ہیں، یادگار شہداء، جی ایچ کیو اور فوجی تنصیبات پر حملے کرنے والے ملک دشمنی کے مرتکب تھے، انہوں نے جی ایچ کیو، کمانڈر ہاؤس پر نہیں بلکہ پاکستان کے دل پر حملہ کیا۔ . میں ان تمام ناپاک عزائم اور ناپاک اعمال کی مذمت کرتا ہوں۔
غلام سرور نے کہا کہ ایسے جرائم میں ملوث افراد کو سخت سے سخت سزا ملنی چاہیے، اداروں سے محاذ آرائی کرنے والوں کی شدید مذمت کرتے ہیں۔
ان کا مزید کہنا تھا کہ اگر ہم پارٹی کے ہر فورم پر محاذ آرائی کی پالیسی سے متفق ہوں تب بھی ہمیں محاذ آرائی نہیں کرنی چاہیے اور نہ اداروں سے لڑنا چاہیے۔
9 مئی کو قومی احتساب بیورو (نیب) نے القادر ٹرسٹ کیس میں پی ٹی آئی چیئرمین عمران خان کو اسلام آباد ہائی کورٹ کے احاطے سے گرفتار کیا تھا جس کے بعد تحریک انصاف کے کارکنوں نے فوجی تنصیبات اور سرکاری املاک پر حملے کیے تھے۔
