اردوورلڈ کینیڈا ( ویب نیوز )لاہور کی انسداد دہشت گردی کی عدالت نے جناح ہاؤس حملے سمیت دیگر مقدمات میں وائس چیئرمین پی ٹی آئی شاہ محمود قریشی کی عبوری ضمانت میں توسیع کردی۔
انسداد دہشت گردی کی عدالت لاہور کے جج اعجاز احمد بٹر نے تین مقدمات میں شاہ محمود قریشی کی عبوری ضمانت کی درخواست پر سماعت کی۔
عدالت نے شاہ محمود قریشی کی ضمانت میں 7 جولائی تک توسیع کر دی۔
واضح رہے کہ پی ٹی آئی رہنماؤں کے خلاف سرور روڈ، گلبرگ اور ریس کورس تھانوں میں مقدمات درج ہیں۔
لاہور کی انسداد دہشت گردی کی عدالت میں پیشی کے موقع پر میڈیا سے گفتگو کرتے ہوئے پی ٹی آئی رہنما شاہ محمود قریشی نے کہا ہے کہ آج یا کل انٹرنیشنل مانیٹری فنڈ (آئی ایم ایف) کا پول کھلنے والا ہے۔
انہوں نے کہا کہ جو بجٹ پیش کیا گیا اور جو پاس ہوا اس میں رات دن کا فرق ہے۔ پاکستانی قوم کو اس مایوسی سے نکالنے کے لیے کوئی بھی منصوبہ بندی اور صف بندی نہیں کر رہا ہے۔ .
شاہ محمود قریشی نے کہا کہ ڈار صاحب کو آئی ایم ایف کے سامنے گھٹنے ٹیکنے پڑے، پیپلز پارٹی اور مسلم لیگ ن اقتدار حاصل کرنے کے لیے دبئی میں ہیں۔
وائس چیئرمین پی ٹی آئی کا کہنا تھا کہ بلاول بھٹو اور مریم نواز وزارت عظمیٰ کے امیدوار ہیں، بھارتی وزیراعظم کے بیان پر کسی نے ردعمل نہیں دیا۔
