اردو ورلڈ کینیڈا ( ویب نیوز )محکمہ موسمیات نے آج سے ملک بھر میں مون سون کی مزید بارشوں کی پیش گوئی کی ہے۔محکمہ موسمیات کے مطابق بارش کا سلسلہ 22 سے 26 جولائی تک جاری رہے گا، مون سون ہوائیں خلیج بنگال سے ملک میں داخل ہو رہی ہیں، مغربی لہر ملک کے بالائی علاقوں کو متاثر کر رہی ہے، جو آئندہ چند روز تک جاری رہے گی۔

محکمہ موسمیات کا کہنا ہے کہ 22 سے 26 جولائی تک کشمیر، گلگت بلتستان میں بارش کا امکان ہے جب کہ مری، گلیات، اسلام آباد، راولپنڈی، پنجاب، خیبرپختونخوا میں تیز ہواؤں، آندھی اور گرج چمک کے ساتھ وقفے وقفے سے بارش کا امکان ہے۔
محکمہ موسمیات کا کہنا ہے کہ کراچی، اسلام آباد، راولپنڈی، پشاور، گوجرانوالہ اور لاہور سمیت سندھ کے مختلف اضلاع میں وقفے وقفے سے بارش کا امکان ہے، موسلادھار بارش سے نشیبی علاقوں میں طغیانی کا خدشہ ہے۔
مری، گلیات، کشمیر، گلگت بلتستان اور خیبرپختونخوا کے پہاڑی علاقوں میں لینڈ سلائیڈنگ کا بھی خطرہ ہے جب کہ 22 اور 23 جولائی کے دوران ڈیرہ غازی خان اور ملحقہ شمال مشرقی بلوچستان کے دریاؤں میں طغیانی کا خطرہ ہے۔