اردو ورلڈ کینیڈا ( ویب نیوز ) افریقی ملک کانگو میں ایک فوجی افسر نے بیٹے کو بغیر اجازت اور اس کی غیر موجودگی میں دفنانے پر بیوی سمیت 13 افراد کو گولی مار کر ہلاک کر دیا۔

غیر ملکی میڈیا رپورٹس کے مطابق کانگو کے شمال مشرقی صوبے اتوری میں ہفتے کے روز ایک فوجی اہلکار نے اپنے بیٹے کو اس کی غیر موجودگی میں دفنانے کے بعد اپنے خاندان اور دیگر افراد پر فائرنگ کر دی جس کے نتیجے میں اس کی بیوی، دو بچوں اور سسرالیوں سمیت 13 افراد ہلاک ہو گئے۔

فوجی افسر کے بیٹے کی جمعرات کو قدرتی وجوہات کی وجہ سے موت ہوئی۔ دوسرے گاؤں میں ڈیوٹی پر مامور افسر بیٹے کی موت کی خبر پا کر اپنے گھر روانہ ہو گیا۔ تاہم جب تک فوجی اہلکار گاؤں پہنچا، اس کے بیٹے کی تدفین ہو چکی تھی۔بیٹے کو بغیر اجازت دفن کرنے اور اس کی غیر موجودگی میں فوجی اہلکار نے بیٹے کی آخری رسومات میں شرکت کرنے والے رشتہ داروں اور دیگر لوگوں کو اکٹھا کیا اور غصے میں فائرنگ کر دی۔اطلاعات کے مطابق فائرنگ سے ان کی اہلیہ اور 2 بچوں سمیت 13 افراد جاں بحق ہوئے۔ واقعے کے بعد فوجی اہلکار موقع سے فرار ہوگیا جس کی تلاش جاری ہے۔ فوجی اہلکار کی فائرنگ سے جاں بحق ہونے والوں میں 10 بچے بھی شامل ہیں۔