اردوورلڈ کینیڈا ( ویب نیوز)سابق خاتون اول بشریٰ بی بی کی بااعتماد دوست فرح گوگی بشریٰ بی بی اور سابق وزیراعظم عمران خان کے خلاف وعدہ معاف گواہ بنیں گی۔
نجی ٹی وی ذرائع سے معلوم ہوا ہے کہ فرح گوگی پہلے ہی پاکستانی حکام کے ساتھ تعاون کر رہی ہیں اور تقریباً ایک ماہ سے ان سے رابطے میں ہیں۔
انہیں اور ان کے شوہر احسن جمیل گجر سے پی ٹی آئی کی قیادت نے کہا ہے کہ وہ وفاقی تحقیقاتی ایجنسی (ایف آئی اے) اور دیگر قانونی فورمز کے ساتھ تعاون نہ کریں۔
ذرائع کا کہنا ہے کہ فرح گوگی پہلے ہی پاکستانی حکام سے اہم معلومات شیئر کر چکی ہیں اور ورکنگ ریلیشن شپ بھی تیار ہو چکی ہے۔
ذرائع نے تصدیق کی کہ فرح گوگی کو مئی کے پہلے ہفتے میں متحدہ عرب امارات (یو اے ای) چھوڑنے کے لیے کہا گیا جب حکومت پاکستان نے خلیجی ریاست کو بتایا کہ فرح گوگی ایک مطلوب شخص ہے اور دبئی میں قیام کے دوران کرپشن میں ملوث رہی تھی۔
ایک انتہائی قابل اعتماد ذریعے نے تصدیق کی کہ فرح گوگی کو متحدہ عرب امارات چھوڑنے کے لیے کہا گیا تھا اور اس کے بعد سے وہ بلیک لسٹ ہو گئی ہیں، یعنی وہ اپنے خلاف مقدمات کی وجہ سے کسی بھی قانونی بنیاد پر متحدہ عرب امارات میں داخل ہونے سے قاصر ہیں۔ فرح گوگی نے اٹلی پہنچ کر پاکستانی حکام سے بات چیت شروع کردی جس میں کافی پیش رفت ہوئی ہے۔
فرح گوگی عمران خان حکومت کے خلاف کامیاب عدم اعتماد کے ووٹ کے ایک دن بعد پاکستان سے فرار ہونے والی پہلی ہائی پروفائل شخصیت تھیں، کیونکہ یہ قیاس آرائیاں پہلے سے ہی پھیلی ہوئی تھیں کہ بشریٰ بی بی کے ساتھ اس کے معاملات اور حکومت چلانے میں براہ راست کردار ادا کرنے کے الزام میں انہیں گرفتار کر کے تفتیش کی جائے گی۔
