اردوورلڈ کینیڈا ( ویب نیوز )آرمی چیف جنرل عاصم منیر نے اقوام متحدہ کی سلامتی کونسل اور سیکرٹری جنرل سے جموں و کشمیر کے مسئلے کے حل کے لیے کردار ادا کرنے کا مطالبہ کرتے ہوئے کہا کہ پاکستان ایسا خطہ چاہتا ہے جہاں امن قائم ہو۔
تفصیلات کے مطابق اجلاس میں اقوام متحدہ کے امن مشن کے وزارتی اجلاس کے حوالے سے تیاریوں کا جائزہ لیا گیا، چیف آف آرمی سٹاف عاصم منیر نے اختتامی سیشن میں بطور مہمان خصوصی شرکت کی۔
امن مشن کے تحفظ اور سلامتی کے موضوع پر اجلاس پاکستان اور جاپان کی مشترکہ میزبانی میں ہوا، اجلاس میں مختلف ممالک کے مندوبین، اقوام متحدہ کے اعلیٰ حکام اور اسلام آباد میں سفارتی برادری کے ارکان نے شرکت کی۔
آرمی چیف نے امن فوج کو درپیش بڑھتے ہوئے چیلنجز اور خطرات پر روشنی ڈالتے ہوئے کہا کہ عالمی امن کے قیام میں اقوام متحدہ کا کردار قابل تحسین ہے، اقوام متحدہ کے امن مشن کو فعال بنا کر امن فوج کے جوانوں کی حفاظت کی جا رہی ہے۔ اور سیکورٹی کو یقینی بناتے ہوئے پیچیدہ خطرات سے نمٹنے میں زیادہ موثر بنیں۔
جنرل عاصم منیر نے کہا کہ پاکستان ایک ایسا خطہ چاہتا ہے جہاں امن قائم ہو، جہاں تجارت، راہداری اور سرمایہ کاری جنوبی، مغربی اور وسطی ایشیا کی تمام ریاستوں کے لیے خوشحالی کا باعث ہو۔ اس موقع پر وزیر خارجہ جلیل عباس جیلانی نے کہا کہ امن کی کوششوں کے لیے پاکستان کا 6 دہائیوں پر محیط عزم عالمی امن و سلامتی میں پاکستان کے کردار کا واضح مظہر ہے۔
وزیر خارجہ نے امن کے عظیم مقصد کے لیے اپنی جانوں کا نذرانہ پیش کرنے والے 171 پاکستانیوں سمیت تمام بہادر مردوں اور خواتین کو خراج تحسین پیش کیا۔
