اردوورلڈ کینیڈا ( ویب نیوز )پیپلز پارٹی کے چیئرمین اور سابق وزیر خارجہ بلاول بھٹو زرداری نے کہا ہے کہ افغانستان میں موجود امریکی اسلحہ سندھ کے کچے ڈاکوئوں تک پہنچ گیا ہے۔ سکھر میں شہید صحافی جان محمد مہر کے اہل خانہ سے ملاقات کے بعد میڈیا سے گفتگو کرتے ہوئے بلاول بھٹو نے کہا کہ جان محمد مہر کے اہل خانہ سے تعزیت کے لیے آیا ہوں۔ شہید کے اہل خانہ کو انصاف دلائیں گے۔

انہوں نے کہا کہ کچے میں پولیس اہلکاروں نے اپنی جانوں کا نذرانہ پیش کیا، کچے کے ڈاکوؤں کے پاس جدید اسلحہ کہاں سے پہنچا، امریکی ہتھیار افغانستان میں دہشت گردوں تک پہنچ چکے ہیں، یہ امریکی ہتھیار صرف کے پی میں نہیں ہمارے کچے کے علاقوں میں ہیں۔ جو ہتھیار امریکی فوج نے افغانستان میں استعمال کیے وہ اب کچے دہشت گردوں کے قبضے میں ہیں۔
انہوں نے کہا کہ جب سے نیشنل ایکشن پلان پر عمل نہیں ہوا دہشت گرد سر اٹھا رہے ہیں، اب کیا وجہ ہے کہ دہشت گرد دوبارہ سر اٹھا رہے ہیں۔ اس کی وجہ یہ ہے کہ پیپلز پارٹی کی پالیسی پر عمل نہیں ہوا، تمام سیاسی جماعتوں نے کہا کہ دہشت گردوں سے بات کریں، لیکن ہمارا موقف یہ تھا کہ ان سے بات نہ کی جائے

“افغانستان کی جیلوں سے فرار ہونے والے دہشتگردوں کو عمران خان نے یہاں آباد کرنے کا پلان بنایا تھا، جو لوگ بھی اس پلان میں شامل تھے کیا انہیں یہ اندازہ نہیں تھا کہ وہ سابق ٹی ٹی پی اور سابق القائدہ کے دہشتگردوں کو فاٹا میں آباد کریں گے تو کتنی دیر میں وہ کراچی پہنچ جائیں گے؟”… pic.twitter.com/bB62DV6dfK

— PPP (@MediaCellPPP) September 12, 2023

بلاول بھٹو زرداری نے کہا کہ آپ اندازہ لگا سکتے ہیں کہ چیئرمین پی ٹی آئی کی پالیسی کتنی خطرناک تھی، عمران خان نے دہشت گردوں کے لیے سرحدیں کھول دیں اور عمران خان نے ملک میں دہشت گردوں کو بسانے کا منصوبہ بنایا
انہوں نے کہا کہ پاکستان کو چلانے کا پرانا طریقہ ختم کیا جائے، افسوس کی بات ہے کہ پاکستانی سیاستدانوں کو شتر مرغ کی سیاست کی عادت ہے، غلط فیصلوں میں ملوث افراد کا احتساب ہونا چاہیے۔
بجلی چوری کے معاملے پر بلاول نے کہا کہ 18-18 گھنٹے بجلی نہیں آتی اور بل ایسا آتا ہے جیسے 24 گھنٹے بجلی استعمال کی گئی ہو۔