لاہور ہائیکورٹ میں جسٹس شجاعت علی خان نے قرآن پاک کے تصحیح شدہ ترجمہ سے متعلق کیس کی سماعت کی۔
عدالت نے نگراں وزیراعظم کو 16 اکتوبر کو پیش ہونے کا حکم دیتے ہوئے نگراں وزیراعلیٰ پنجاب کو بھی آئندہ سماعت پر طلب کرلیا۔
عدالت نے ریمارکس دیئے کہ 8 ماہ سے وفاقی حکومت کی رپورٹ نہیں آئی۔
وفاق کے وکیل نے کہا کہ ‘ہم رپورٹس جمع کراتے ہیں عدالت نے ریمارکس دیے کہ آپ یہاں سیر کے لیے آئے ہیں، رپورٹ کیوں پیش نہیں کی؟ یہ کیس نہ آپ کا ہے نہ عدالت کا، ہم سب کا ہے۔
جسٹس شجاعت علی خان نے برہمی کا اظہار کرتے ہوئے کہا کہ ہم ملک کے چیف ایگزیکٹو کو بلائیں گے، نگراں وزیراعظم خود آکر جواب دیں، لگتا ہے معاملہ نگران وزیراعظم کے سامنے نہیں رکھا گیا۔
وفاق کے وکیل کی جانب سے مزید وقت کی استدعا پر عدالت نے ریمارکس دیئے کہ اگر آپ سنجیدہ ہوتے تو ہمیں رپورٹ پیش کر دیتے، نگراں وزیراعظم پیش ہو کر اپنی پوزیشن واضح کریں۔