رپورٹ کے مطابق مسلم لیگ (ن) ملک بھر سے اپنے کارکنوں سے اپیل کر رہی ہے کہ وہ آج لاہور میں مینار پاکستان پر اپنے قائد کا استقبال کرنے اور پارٹی کی ‘بے پناہ مقبولیت کو ظاہر کرنے کے لیے جمع ہوں تاہم مسلم لیگ (ن) کے حریفوں کا دعویٰ ہے کہ پارٹی اب اپنی مقبولیت کھو چکی ہے۔
سابق وزیر خزانہ اور مسلم لیگ (ن) کے رہنما اسحاق ڈار نے تصدیق کی ہے کہ نواز شریف ہفتہ کی سہ پہر چارٹرڈ طیارے کے ذریعے دبئی سے اسلام آباد پہنچیں گے۔
اسحاق ڈار نے گزشتہ روز صحافیوں کو بتایا کہ اسلام آباد میں ایک گھنٹے تک قیام کے بعد نواز شریف مینار پاکستان پر جلسے سے خطاب کے لیے لاہور روانہ ہوں گے۔
مسلم لیگ (ن) کے مطابق نواز شریف ممکنہ طور پر 12:30 بجے چارٹرڈ فلائٹ سے اسلام آباد پہنچیں گے اور چند گھنٹے بعد لاہور روانہ ہوں گے۔
سیاسی مبصرین کا کہنا ہے کہ نواز شریف کے لاہور کے بجائے اسلام آباد پہنچنے کی وجہ یہ ہے کہ انہیں ضمانت کے لیے دارالحکومت میں داخل ہونا ضروری ہے جسے جمعرات کو اسلام آباد ہائی کورٹ نے منظور کر لیا۔
پنجاب سے تعلق رکھنے والے ایک پارٹی رہنما نے کہا کہ نواز شریف کی وطن واپسی پر بڑا شو کرنا بہت ضروری ہے تاکہ سب کو معلوم ہو کہ مسلم لیگ (ن) آج بھی لاہور میں ایک مقبول جماعت ہے پارٹی قیادت اس مقصد میں کامیاب ہوگی کیونکہ بہت کچھ داؤ پر لگا ہوا ہے۔
انہوں نے کہا کہ نواز شریف کی آمد سے پارٹی کو ایک ایسے وقت میں بہت ضروری تحریک ملے گی جب ملک میں چند ماہ میں عام انتخابات ہونے کی توقع ہے، وہ پارٹی کی انتخابی مہم کی قیادت کریں گے اور چوتھی بار وزیراعظم بنیں گے۔
لاہور میں شہباز شریف، مریم نواز شریف اور حمزہ شہباز سمیت مسلم لیگ (ن) کی قیادت نے گزشتہ روز مصروف دن گزارا تاکہ اس بات کو یقینی بنایا جاسکے کہ بلوچستان، سندھ اور گلگت بلتستان سے پارٹی کارکنوں کے قافلے لاہور کے لیے روانہ ہوئے۔
پھولوں کا انتظام
گزشتہ روز صدر مسلم لیگ (ن) پنجاب رانا ثناء اللہ اور صدر مسلم لیگ (ن) لاہور سیف الملوک کھوکھر نے ہیلی کاپٹر کے ذریعے جلسہ گاہ کا فضائی نظارہ کیا۔
مسلم لیگ (ن) نے مبینہ طور پر گزشتہ رات لاہور پہنچنے والوں کے لیے رہائش کے انتظامات کر لیے ہیں، لاہور سے پارٹی کے چند سابق اراکین اسمبلی کو رہائش اور کھانے کے انتظامات کا کام سونپا گیا ہے۔
اگرچہ پارٹی کا 10 لاکھ لوگوں کو اکٹھا کرنے کا بڑا ہدف ہے، لیکن کل منتظمین نے پنڈال میں صرف 10,000 کرسیاں رکھی ہیں۔
وزیر اعلیٰ پنجاب محسن نقوی کی قیادت میں نگر ان صوبائی حکومت بھی سیاسی پاور شو کے لیے مسلم لیگ (ن) کے ساتھ مکمل تعاون کر رہی ہے۔
مسلم لیگ ن نے ٹکٹ کے خواہشمندوں سے یہ بھی واضح طور پر کہہ دیا ہے کہ اگر وہ آج لوگوں کو پنڈال میں لانے کا مطلوبہ ہدف پورا کرنے میں ناکام رہے تو انہیں پارٹی امیدوار نہیں سمجھا جائے گا۔
پارٹی کے مطابق آج مینار پاکستان پر جلسے سے صرف نواز شریف خطاب کریں گے، مسلم لیگ ن نے آج لاہور میں گلاب کی پتیاں نچھاور کرنے کے لیے 2 چھوٹے طیارے بھی کرائے پر لیے ہیں۔
