پاک فوج کے شعبہ تعلقات عامہ (آئی ایس پی آر) کے مطابق 25ویں قومی سلامتی ورکشاپ کے شرکاء نے جی ایچ کیو کا دورہ کیا اور آرمی چیف سے ملاقات کی۔ ملاقات کے دوران آرمی چیف نے کہا کہ پاکستان کی مسلح افواج، سیکیورٹی اور انٹیلی جنس ادارے دشمن قوتوں کی مسلسل کوششوں کے باوجود دہشت گردی کی لعنت کا بہادری سے مقابلہ کر رہے ہیں۔
ان کا مزید کہنا تھا کہ ہر پاکستانی کی جان و مال کی حفاظت انتہائی اہمیت کی حامل ہے جس پر کسی قیمت پر سمجھوتہ نہیں کیا جا سکتا، ہم ایک مضبوط قوم ہیں جس نے امن و استحکام کے حصول کے لیے کئی آزمائشوں کا سامنا کیا ہے
آرمی چیف جنرل سید عاصم منیر نے شرکا کو اسمگلنگ، بجلی چوری، منشیات کے پھیلاؤ، سرحدی کنٹرول کے اقدامات اور پاکستان سے غیر قانونی تارکین وطن کی وطن واپسی سمیت غیر قانونی سرگرمیوں کو روکنے کے لیے کیے جانے والے اقدامات سے بھی آگاہ کیا
اس کے علاوہ آرمی چیف نے اسپیشل انویسٹمنٹ فیسیلیٹیشن کونسل کے نتیجے میں معیشت پر پڑنے والے مثبت اثرات کو بھی اجاگر کیا جس نے معیشت کی بہتری کے لیے متعدد فعال اقدامات کیے ہیں۔
جنرل سید عاصم منیر نے کہا کہ فوج پاکستان کے عوام کی بہتری کے لیے ریاست کے دیگر اداروں کے ساتھ مل کر قومی اور صوبائی سطح پر مختلف شعبوں میں پوری طرح مصروف عمل ہے
