5 اور 6 نومبر کو رشمیکا منڈنا کے نام سے ایک مختصر ویڈیو بھارتی سوشل میڈیا پر وائرل ہوئی، جس میں لوگوں نے اداکارہ کو ان کے بولڈ انداز پر تنقید کا نشانہ بنایا۔
وائرل ہونے والی ایک مختصر ویڈیو میں ایک خاتون کو لفٹ سے باہر نکلتے ہوئے دیکھا جا سکتا ہے اور مذکورہ خاتون نے انتہائی تنگ اور مختصر لباس پہن رکھا ہے۔
ویڈیو میں نظر آنے والی خاتون کا چہرہ اداکارہ رشمیکا مندانہ سے ملتا جلتا نظر آرہا ہے اور ویڈیو دیکھ کر لوگوں نے اداکارہ کو تنقید کا نشانہ بنایا۔
تاہم جلد ہی صحافیوں اور حقائق کی جانچ کرنے والوں نے سوشل میڈیا صارفین کو بتایا کہ مذکورہ ویڈیو رشمیکا کی نہیں بلکہ کسی اور کی ویڈیو ہے، جسے اس طرح ایڈٹ کیا گیا ہے کہ ویڈیو کو حقیقی مانا جائے۔
صحافی ابھیشیک نے وائرل ہونے والی ویڈیو کو شیئر کرتے ہوئے کہا کہ مذکورہ ویڈیو رشمیکا مندانا کی نہیں بلکہ زارا پٹیل نامی ہندوستانی نژاد خاتون کی ہے جسے ڈیپ فیک کے طور پر ایڈٹ کیا گیا تھا۔
انہوں نے ڈیپ فیک ویڈیوز بنانے والوں کے خلاف کارروائی کا مطالبہ بھی کیا اور ان کے اس ٹویٹ کو بالی ووڈ کے ‘بگ بی امیتابھ بچن نے بھی ری ٹویٹ کرتے ہوئے جعلی ویڈیوز بنانے والوں کے خلاف کارروائی کا مطالبہ کیا۔
بعد ازاں رشمیکا مندانا نے بھی اپنی انسٹاگرام اسٹوری میں واضح کیا کہ وائرل ویڈیو ان کی نہیں ہے بلکہ اسے ایڈٹ کرکے ان کی ویڈیو کے طور پر شیئر کیا گیا تھا۔
ان کے مطابق ویڈیو میں نظر آنے والی خاتون کا چہرہ ا ن کے چہرے سے بدل دیا گیا تھا۔
رشمیکا مندانا کا کہنا تھا کہ اگر یہی ویڈیو اس وقت بنائی جاتی جب وہ اسکول اور کالج کی طالبہ تھیں تو یقیناً ان کے لیے ایسی جعلی ویڈیوز کا دباؤ برداشت کرنا ناممکن تھا، لیکن اب وہ اس طرح کی جعلی ویڈیوز کا دباؤ برداشت کر سکتی ہیں۔انہوں نے مطالبہ کیا کہ ایسی جعلی ویڈیوز بنانے والوں کے خلاف کارروائی کی جائے تاکہ ایسے لوگ جعلی ویڈیوز بنا کر کسی لڑکی یا خاتون کو پریشان نہ کر سکیں۔
