غزہ میں اسرائیل اور حماس کے درمیان جنگ بندی 24 نومبر کو شروع ہوئی تھی جس میں دو بار توسیع کی گئی تھی اور یہ جنگ بندی جمعہ کی صبح بغیر کسی توسیع کے ختم ہو گئی تھی۔عرب میڈیا کے مطابق غزہ میں 7 روزہ جنگ بندی ختم ہونے کے بعد شمالی غزہ میں دھماکوں اور فائرنگ کی آوازیں سنائی دے رہی ہیں۔حماس نے جنگ بندی کے ساتویں روز مزید 8 اسرائیلی یرغمالیوں کو رہا کر دیا۔
فلسطینی وزارت داخلہ کا کہنا ہے کہ اسرائیلی طیاروں نے غزہ پر فضائی حملے شروع کر دیے ہیں۔فلسطینی میڈیا کے مطابق اسرائیلی فوج نے خان یونس کے مشرقی علاقے پر بمباری کی اور غزہ کے مغربی علاقے پر بھی بمباری جاری ہے جب کہ اسرائیلی جاسوس طیارے غزہ پر نچلی پروازیں کر رہے ہیں۔
یہ بھی پڑھیں
جنگ بندی کا ساتو اں دن ،حماس نے مزید 8 اسرائیلی رہا کر دئیے
فلسطینی میڈیا کا کہنا ہے کہ اسرائیلی فوج نے شمالی غزہ کے علاقے جبالیہ میں ایک گھر کو نشانہ بنایا ہے جب کہ غزہ کے مختلف علاقوں میں شدید جھڑپیں جاری ہیں۔اسرائیلی میڈیا کا کہنا ہے کہ جمعے کی صبح غزہ سے ایک راکٹ فائر کیا گیا تھا جسے اسرائیلی فوج نے ٹریس کیا جب کہ راکٹ حملے کے بعد علاقے میں سائرن بھی بجائے گئے۔
