احتساب عدالت کے جج نے عمران خان کی عبوری ضمانت کی درخواست پر فیصلہ محفوظ کرلیا جو کچھ دیر بعد سنایا گیا۔ توشہ خانہ کیس میں جج محمد بشیر نے عمران خان کی عبوری ضمانت خارج کرتے ہوئے ان کی گرفتاری کا حکم دیا۔ عدالت نے کہا ہے کہ بادی النظر میں توشہ خانہ کے تحائف کی وصولی میں بے ضابطگیاں ہوئیں۔
حکم نامے کے بعد نیب نے توشہ خانہ کیس میں بھی سابق وزیراعظم کی گرفتاری کا انکشاف کیا ہے۔ نیب پراسیکیوٹر سردار مظفر نے کہا ہے کہ کل توشہ خانہ کیس میں سابق وزیراعظم کا جسمانی ریمانڈ حاصل کریں گے۔
عمران خان کے وکیل نعیم حیدر پنجوٹھہ نے کہا ہے کہ رات 8 بجے عبوری ضمانت پر گرفتاری عجیب تماشا ہے، تاہم ریمانڈ کے باوجود عمران خان اڈیالہ جیل میں ہی رہیں گے، تاہم یہاں نیب ان سے تفتیش کر سکے گا۔
ادھر القادر یونیورسٹی 190 ملین پاؤنڈ کیس میں سابق وزیراعظم کی درخواست ضمانت کی سماعت 19 دسمبر تک ملتوی کر دی گئی۔
