دفتر خارجہ کے ترجمان کے مطابق پاکستان ایران کی جانب سے اپنی فضائی حدود کی بلا اشتعال خلاف ورزی کی شدید مذمت کرتا ہے جس کے نتیجے میں دو بے گناہ بچے جاں بحق اور تین لڑکیاں زخمی ہوئیں. پاکستان کی خودمختاری کی یہ خلاف ورزی بالکل ناقابل قبول ہے.
ترجمان نے کہا کہ اس کے سنگین نتائج برآمد ہو سکتے ہیں, اور یہ اور بھی تشویشناک ہے کہ یہ غیر قانونی عمل پاکستان اور ایران کے درمیان رابطے کے متعدد ذرائع کے وجود کے باوجود ہوا ہے.
پاکستان نے پہلے ہی تہران میں ایرانی وزارت خارجہ کے متعلقہ سینئر اہلکار کے ساتھ سخت احتجاج درج کرایا ہے، ایرانی وزیر امور کو وزارت خارجہ میں طلب کیا ہے,
دفتر خارجہ کے ترجمان کے مطابق پاکستان نے ہمیشہ کہا ہے کہ دہشت گردی خطے کے تمام ممالک کے لیے ایک مشترکہ خطرہ ہے جس کے لیے مربوط کارروائی کی ضرورت ہے. اس طرح کے یکطرفہ اقدامات اچھے پڑوسی تعلقات سے مطابقت نہیں رکھتے اور دو طرفہ اعتماد کو شدید نقصان پہنچا سکتے ہیں.
اس سے قبل ایران نے دعویٰ کیا تھا کہ اس نے پاکستان کے صوبہ بلوچستان میں کالعدم جیش العدل کے ٹھکانوں کو نشانہ بنایا ہے.