امریکی محکمہ خارجہ کے ترجمان میتھیو ملر نے پریس بریفنگ میں کہا کہ مریم نواز کا بطور وزیر اعلی انتخاب پاکستانی سیاست میں سنگ میل ہے۔ترجمان امریکی محکمہ خارجہ کا کہنا تھا کہ پاکستان کے ساتھ دیرینہ شراکت داری ہے، امریکا پاکستان کے ساتھ اتحاد کو قدر کی نگاہ سے دیکھتا ہے۔

میتھیو ملر نے کہا کہ ایک خوشحال اور جمہوری پاکستان امریکہ اور پاکستان کے مفادات کے لیے اہم ہے اور وہ وزیراعظم شہباز شریف اور ان کی حکومت کے ساتھ مشترکہ مفادات کو آگے بڑھانے پر توجہ دیتے رہیں گے۔ان کا مزید کہنا تھا کہ وہ خواتین کو ملک کے سیاسی دھارے میں شامل کرنے کے لیے پاکستان کے ساتھ تعاون کے خواہاں ہیں، پاکستان امریکن ویمن کونسل، سول سوسائٹی اور دیگر فیصلہ ساز اداروں کے ساتھ تعاون جاری ہے۔