اردو ورلڈ کینیڈا ( ویب نیوز ) برطانوی وزیراعظم رشی سونک کے گھر کے باہر احتجاج کرنے والے مظاہرین میں سے 4 گھر میں گھس گئے جنہیں پولیس نے بروقت حراست میں لے لیا۔بین الاقوامی خبر رساں ادارے کے مطابق برطانوی وزیراعظم رشی سونک کے گھر کے باہر آئل اینڈ گیس کے لائسنس کے اجرا کے خلاف احتجاج کیا جا رہا تھا کہ اس دوران ایک شخص گھر میں گھس گیا۔

یارکشائر پولیس کا کہنا ہے کہ مختلف علاقوں سے 20، 21، 43 اور 52 سال کی عمر کے چار افراد کو برطانوی وزیراعظم کے گھر میں داخل ہونے پر گرفتار کیا گیا۔پولیس کا کہنا ہے کہ ان چاروں افراد کو ایک منٹ سے بھی کم وقت میں گرفتار کیا گیا۔ تفتیش جاری ہے۔یہ پہلا موقع ہے کہ وزیراعظم کی رہائش گاہ کے باہر احتجاج کیا گیا ہے۔واضح رہے کہ وزیر اعظم رشی سونک جب احتجاج کیا جا رہا تھا تو اپنے گھر پر موجود نہیں تھے۔ وہ سرکاری فرائض کی وجہ سے لندن میں مقیم ہیں۔رشی سونک نے 25 اکتوبر 2022 کو برطانیہ کے وزیر اعظم کا عہدہ سنبھالا۔