اردوورلڈ کینیڈا( ویب نیوز)سپریم کورٹ آف پاکستان میں ایڈہاک ججز کی تقرری سے متعلق جوڈیشل کمیشن کا اجلاس آج ہوگا۔تفصیلات کے مطابق سپریم کورٹ میں ایڈہاک ججز کی تقرری سے متعلق جوڈیشل کمیشن کا اجلاس آج سہ پہر تین بجے چیف جسٹس قاضی فائز عیسیٰ کی سربراہی میں ہوگا۔ ایڈہاک ججز کے لیے سپریم کورٹ کے چار ریٹائرڈ ججز کے نام تجویز کیے گئے ہیں۔ جسٹس ریٹائرڈ مشیر عالم، جسٹس ریٹائرڈ مقبول باقر، جسٹس ریٹائرڈ مظہر عالم میاں خیل اور جسٹس ریٹائرڈ طارق مسعود کے نام شامل ہیں۔
چار ریٹائرڈ ججوں کے نام چیئرمین جوڈیشل کمیشن چیف جسٹس قاضی فائز عیسیٰ نے تجویز کیے، جسٹس ریٹائرڈ سردار طارق مسعود اور جسٹس ریٹائرڈ مظہر عالم میاں خیل نے رضامندی ظاہر کی جبکہ جسٹس ریٹائرڈ مقبول باقر نے ایڈہاک جج بننے پر رضامندی ظاہر نہیں کی۔ اس سے قبل جسٹس ریٹائرڈ مشیر عالم بھی ایڈہاک جج کی ذمہ داری لینے سے معذرت کر چکے ہیں۔
دوسری جانب پاکستان تحریک انصاف (پی ٹی آئی) نے سپریم کورٹ میں ایڈہاک ججز لانے کے فیصلے کی مخالفت کرتے ہوئے سپریم جوڈیشل کونسل میں جانے کا اعلان کیا ہے۔