اردوورلڈ کینیڈا(ویب نیوز)پاکستان تحریک انصاف کے ترجمان رؤف حسن نے کہا ہے کہ قومی اور پنجاب اسمبلیوں کی مخصوص نشستوں کے معاملے پر پی ٹی آئی کے نئے نام سامنے آئیں گے اور ایسے نام سامنے آئیں گے کہ مزہ آئے گا۔
ترجمان پی ٹی آئی رؤف حسن نے نجی ٹی وی کے پروگرام میں گفتگو کرتے ہوئے کہا کہ قومی اور پنجاب اسمبلیوں کی مخصوص نشستوں کے معاملے پر نئے نام سامنے آئیں گے، یہ وہ لوگ ہیں جو پارٹی کے ساتھ بہت مخلص ہیں اور انہوں نے کھڑے رہتے ہوئے قربانیاں دی ہیں۔
انہوں نے کہا کہ مخصوص نشستوں کے حوالے سے نام فی الحال ظاہر نہیں کر سکتے، فہرستیں بانی پی ٹی آئی کے پاس جائیں گی اور وہ اس کی منظوری دیں گے۔ .
انہوں نے کہا کہ پورے آئینی بحران کا ذمہ دار الیکشن کمیشن ہے، چیف الیکشن کمشنر کو مستعفی ہونا پڑے گا یا نہیں اس کا فیصلہ جلد ہو جائے گا۔ رؤف حسن نے کہا کہ 39 ارکان کو سپریم کورٹ نے تسلیم کیا، اس فیصلے پر عمل درآمد کے لیے 22 دن ہیں، الیکشن کمیشن کے اپنے بیان کے مطابق ان اڑتالیس امیدواروں کے ساتھ پی ٹی آئی لکھا تھا۔
ایک سوال کے جواب میں انہوں نے کہا کہ الیکشن کمیشن نے عمر ایوب کو نہیں بلایا، مجھے اور بیرسٹر گوہر کو بلایا گیا ہے، بلایا گیا تو ہم جائیں گے، تاہم اس حوالے سے فیصلہ بیرسٹر گوہر کریں گے۔انہوں نے کہا کہ ایڈہاک ججز کے معاملے پر ہمارا اصولی اختلاف ہے، حکومت سپریم کورٹ کے فیصلوں کو کنٹرول کرنا چاہتی ہے۔ ایک سوال کے جواب میں انہوں نے کہا کہ اگر آئینی عدالتیں قائم کرنی ہیں تو معاملہ پارلیمنٹ میں جانا چاہیے۔ پارلیمنٹ میں اتفاق رائے ہو تو کوئی مضائقہ نہیں۔ پہلے اس معاملے کو پارلیمنٹ میں لے آئیں۔ یہ تبدیلی آئینی ترمیم سے ہی آئے گی۔ .