اردوورلڈ کینیڈا( ویب نیوز)چوروں نے طوفانی نالوں میں سیلاب کی پیشگی وارننگ کا مکمل نظام چوری کر لیا ہے۔
نجی ٹی وی کے مطابق راولپنڈی میں واسا کے واٹر لیول گیج اسٹیشن پر چوری کی جرات مندانہ واردات کی گئی جس میں چور نالہ لئی سمیت 15 برساتی نالوں میں فلڈ وارننگ کا مکمل نظام لے گئے۔
نامعلوم چوروں نے تیز دھار آلے سے واٹر لیول گیج اسٹیشن کے قلابے کاٹ ڈالے۔ سیلاب اور بارشوں کی موجودہ صورتحال بتانے والا یہ جدید نظام جاپان نے دیا تھا۔ چور سسٹم کے سولر پینلز، بھاری بیٹریاں، قیمتی کمپیوٹر اور آلات بھی لے گئے۔ نامعلوم چوروں نے کئی گھنٹے تک اطمینان کے ساتھ ڈکیتی کی واردات کی۔
سسٹم کی چوری کے بعد سیلاب اور بارش کی صورتحال کی پیشگی اطلاعات کا نظام مکمل طور پر مفلوج ہو گیا۔ یہ جاپان کا سب سے جدید ترین خودکار سیلاب کی وارننگ سسٹم تھا۔ چوری کی واردات کے بعد واسا کا یہ واٹر لیول گیج اسٹیشن کباڑ خانے کی طرح نظر آنے لگا ہے۔
واسا نے چوری کے واقعے کی انکوائری شروع کر دی ہے تاہم کلوز سرکٹ کیمرہ خاموش ہے۔ سیلاب اور بارشوں کی صورتحال کا یہ نظام گزشتہ 15 سالوں سے بالکل کام کر رہا تھا۔ اس بڑی چوری کے حوالے سے ڈپٹی کمشنر اور کمشنر نے بھی رپورٹ طلب کر لی ہے۔
102
