اردوورلڈ کینیڈا( ویب نیوز)حماس کے رہنما اسماعیل ھنیہ کی شہادت پر آج پاکستان بھر میں یوم سوگ منایا جا رہا ہے۔نماز جمعہ کے بعد ملک بھر میں شہید اسماعیل ہانیہ کی غائبانہ نماز جنازہ ادا کی جائے گی۔
گزشتہ روز وزیر اعظم شہباز شریف کی زیر صدارت حکومت اور اتحادی جماعتوں کے درمیان معصوم فلسطینیوں پر اسرائیل کے بڑھتے ہوئے مظالم پر مشاورتی اجلاس ہوا جس میں شرکاء نے مشترکہ طور پر اسرائیل کی جانب سے جاری مظالم پر شدید غم و غصے کا اظہار کیا
اجلاس میں اسماعیل ھنیہ شہید کی غائبانہ نماز جنازہ جمعہ کی نماز کے بعد پورے ملک میں ادا کرنے کا فیصلہ کیا گیا اور فلسطین سے مکمل یکجہتی کے اظہار کے لیے پارلیمنٹ میں خصوصی قرارداد پیش کرنے کا بھی فیصلہ کیا گیا۔
جاری کردہ اعلامیہ کے مطابق اجلاس میں مسلم لیگ (ن)، پیپلز پارٹی، بلوچستان عوامی پارٹی، متحدہ قومی موومنٹ، استحکام پاکستان پارٹی، مسلم لیگ (ق)، مسلم لیگ ضیاء، نیشنل پارٹی کے رہنماؤں اور سینئر نمائندوں نے شرکت کی۔
اجلاس کے شرکاء نے اسرائیلی مظالم کی شدید مذمت کرتے ہوئے بے گناہ فلسطینی بھائیوں اور بہنوں کے ساتھ مکمل یکجہتی کا اظہار کیا۔ تہران میں حماس کے سربراہ اسماعیل ھنیہ کی شہادت پر گہرے رنج و غم کا اظہار کیا گیا
شرکاء نے اتفاق کیا کہ یہ واقعہ فلسطینیوں پر جاری ظلم و ستم کو روکنے اور خطے میں امن کے قیام کی کوششوں کو سبوتاژ کرنے کی دانستہ سازش ہے۔
وزیراعظم نے فلسطین میں جاری اسرائیلی ریاستی جبر کو امت مسلمہ کے لیے المیہ قرار دیا اور اجلاس میں پرزور مطالبہ کیا کہ بے گناہ فلسطینیوں تک انسانی امداد کی فوری رسائی کو یقینی بنایا جائے۔