اردوورلڈ کینیڈا ( ویب نیوز)یوم دفاع کے موقع پر چیئرمین چیفس آف سٹاف کمیٹی، سروسز چیفس اور مسلح افواج نے 6 ستمبر 1965 کے شہداء کو خراج عقیدت پیش کیا۔
پاک فوج کے شعبہ تعلقات عامہ (آئی ایس پی آر) کے مطابق ہمارے بہادر جوانوں نے انتہائی بہادری سے مادر وطن کا دفاع کرتے ہوئے دشمن کے ناپاک عزائم کو ناکام بنا دیا۔
آئی ایس پی آر کے مطابق مسلح افواج نے دشمن کے عزائم ناکام بناتے ہوئے تاریخی فتح حاصل کی جو تاریخ میں ہمیشہ یاد رکھی جائے گی۔ آج کے دن ہم ان شہداء کو دل کی گہرائیوں سے خراج عقیدت پیش کرتے ہیں جنہوں نے 1947 سے پاکستان کے دفاع میں اپنی جانوں کا نذرانہ پیش کیا۔
دہشت گردی کے خلاف جنگ اور جنگ میں لازوال قربانیاں دینے والوں کو بھی خراج تحسین، شہداء کی قربانیوں کو کبھی فراموش نہیں کیا جائے گا، ہم بہادری سے لڑنے والے سابق فوجیوں کو بھی سلام پیش کرتے ہیں، آئیے اس یوم دفاع و شہدا پر ہم اپنے شہداء اور ہیروز کی یاد کو خراج عقیدت پیش کریں ۔