اردوورلڈ کینیڈا( ویب نیوز)وزیر اعلیٰ علی امین گنڈا پور نے اسلام آباد پولیس پر جلسہ گاہ سے سامان ضبط کرنے کا الزام لگاتے ہوئے سخت زبان استعمال کی ہے۔
پشاور میں میڈیا سے گفتگو کرتے ہوئے وزیراعلیٰ نے کہا کہ اسلام آباد میں پہلے جلسے کی جگہ تبدیل کر کے ہمارا سامان قبضے میں لے کر تھانہ ترنول منتقل کر دیا گیا ہے۔ سامان واپس کر دو ورنہ میں تھانے جا کر خود سامان نکال کر دکھاؤں گا۔
وزیراعلیٰ نے کہا کہ ہمیں جلسے کا سامان بتائی گئی جگہ پر لگا نے دیں ورنہ میں آکر جلسہ بھی کرلوں گا اور سامان بھی لے لوں گا۔ وہ سن لیں جنہوں نے پولیس کو حکم دیا کہ یہ ملک ان کے باپ کا نہیں ہے۔ پہلے پائوں پکڑتے ہیںیہ ہمارے لیڈر کا طرز عمل ہے جس نے حالات کی وجہ سے جلسہ کینسل کیا تھا اور اب ڈرامے بنا رہے ہو۔
علی امین گنڈا پور نے کہا کہ اجازت ملے یا نہ ملے، میں واضح کرتا ہوں کہ 8 ستمبر کو اسلام آباد میں جلسہ ہوگا اور اگر سامان تھانہ ترنول میں ہے تو اسے بھی نکال کر دکھاؤں گا۔ وزیراعلیٰ نے کہا کہ قوم نے جلسے میں شرکت کرنی ہے، میں پورے انتظامات کے ساتھ آؤں گا اور جلسہ کو لازمی بناؤں گا۔