اردو ورلڈ کینیڈا ( ویب نیوز ) ایران کی جانب سے روس کو بیلسٹک میزائل دینے کی اطلاعات ہیں،برطانیہ، فرانس اور جرمنی نے ایران کا یہ اقدام یورپی سلامتی کے لیے براہ راست خطرہ قرار دیدیا ۔ایک مشترکہ بیان میں تینوں مغربی ممالک نے مطالبہ کیا کہ ایران فوری طور پر یوکرین جنگ میں روس کی حمایت بند کر دے اور کہا کہ میزائلوں کی ترسیل کشیدگی میں اضافے کے مترادف ہے۔خبر رساں ایجنسی کے مطابق ایران نے روس کو بیلسٹک میزائل فراہم کرنے کی خبروں کی تردید کی ہے۔
اپنے ردعمل میں ایران کا کہنا ہے کہ غزہ میں نسل کشی کے لیے امریکی اور مغربی ہتھیاروں کے غیر قانونی استعمال کو چھپانے کے لیے پروپیگنڈا کیا جا رہا ہے۔یہ مغربی ممالک، جو دوسرے ممالک کو ایرانی ہتھیاروں کی ترسیل کے بارے میں گمراہ کن معلومات پھیلاتے ہیں، صہیونی حکومت کو اس کے جنگی جرائم کے لیے ہر قسم کے ہتھیار فراہم کرتے ہیں۔
