اردوورلڈ کینیڈا( ویب نیوز)اسلام آباد میں جمعیت علمائے اسلام کے سربراہ مولانا فضل الرحمان کی رہائش گاہ مجوزہ آئینی ترامیم پر سیاسی سرگرمیوں کا مرکز بن چکی ہے۔.
پی ٹی آئی کے وفد کے بعد وزیراعظم شہباز شریف بغیر کسی پروٹوکول کے رات گئے مولانا فضل الرحمان کے گھر پہنچے۔.
چیئرمین پیپلز پارٹی بلاول بھٹو زرداری پہلے ہی مولانا کی رہائش گاہ پر موجود تھے، اجلاس میں آئینی ترامیم پر تبادلہ خیال کیا گیا لیکن وزیر اعظم اور بلاول بھٹو مولانا فضل الرحمان کو قائل نہ کر سکے، اجلاس میں آئینی ترمیم پر کوئی پیش رفت نہیں ہوئی۔.
ذرائع کے مطابق مولانا فضل الرحمان نے جے یو آئی کے ارکان اسمبلی کو ہراساں کیے جانے پر برہمی کا اظہار کیا۔.
مولانا فضل الرحمان نے کہا کہ اپوزیشن جماعتیں آئینی ترامیم کے معاملے پر متفقہ لائحہ عمل اپنانے پر غور کر رہی ہیں، حکومت کو پیشکش دینے اور اپوزیشن ارکان پر دباؤ ڈالنے کے عمل کو ترک کر دینا چاہیے، ماحول کو برقرار رکھنے کے لیے اعتماد کا ماحول پیدا کرنا چاہیے ملاقات کے بعد وزیراعظم شہباز شریف اور بلاول بھٹو میڈیا سے بات کیے بغیر مولانا فضل الرحمان کے گھر سے نکل گئے۔.